Search

 «Հայաստան» ցուցահանդես Նյու Յորքի Մետրոպոլիտենի արվեստի թանգարանում

Նյու Յորքի Մետրոպոլիտենի արվեստի թանգարանը 2018թ սեպտեմբերի 21-ից մինչև հունվարի 13, 2019թ. հյուրընկալել է «Հայաստան» խորագիրը կրող բացառիկ ցուցահանդեսը, որտեղ ներկայացվել է հայ ժողովրդի պատմական ու մշակութային ժառանգությունը՝ սկսած IV դարից՝ քրիստոնեության ընդունումից, հայերեն գրերի գյուտից, մինչև XVII դար:

Հայաստանի խոշոր թանգարաններից՝ Հայաստանի պատմության թանգարան, Էջմիածնի Մայր Աթոռի թանգարաններ, Մատենադարան, ընտրված 82 նմուշների հետ մեկտեղ, ներկայացվել են նաև նմուշներ՝ փոխառված Երուսաղեմի Սրբոց Հակոբյանց վանքից, Մեծի տանն Կիլիկիո Կաթողիկոսարանից, Վենետիկի Մխիթարյան միաբանությունից, Գալուստ Գյուլբենկյան հիմնարկությունից, մշակութային այլ կենտրոններից և անհատական հավաքածուներից:

Հայաստանի պատմության թանգարանից 34 արժեքավոր նմուշներից մեկը՝ IV – V դդ. Խարաբավանքի քառանիստ կոթողը (Արագածի հարավային լանջ, Ուջան գյուղի մերձակայք) այս ցուցահանդեսի մեջ առանցքային և բացառիկ նշանակություն ուներ, իբրև հայկական մշակույթի ու արվեստի ինքնատիպ ֆենոմենի, նրա ակունքի փաստացի վկայություն:

Ցուցահանդեսում ընդգրկված ավելի քան 140 նմուշները՝ տարբեր նյութերի, ձևերի, տիպերի մեջ դրոշմված հետքերով, տարբեր ժամանակների և մշակութային միջավայրերի համատեքստերում, վերստեղծեցին ինքնատիպ տարեգրությունը և անընդհատելի ընթացքը հոգևոր այն արժեքների, որոնք վկայում են Հայաստանի մշտակա ներկայությունը և ավանդը համաշխարհային քաղաքակրթության մեջ:

Աղբյուրը՝ www.historymuseum.am

Հեռ.՝ (010) 599 629
Հասցե՝ 0010, Երևան Վազգեն Սարգսյան 3, Կառավարական տուն 2
Էլ-փոստ՝ info@escs.amsecretariat@escs.am