Search

«Խաչքար. Խաչքարի արվեստը» գրքի շնորհանդես

Մայիսի 4-ին, ժամը՝ 16:00, «Զանգակ» գրատանը (Աբովյան 7) տեղի կունենա Յարությիւն Խաչատուրեանի և Միշէլ Պասմաճեանի «Խաչքար. Խաչքարի արվեստը» գրքի շնորհանդեսը:

Ամբողջությամբ խաչքարերին նվիրված այս ծավալուն հատորն ունի երկու նպատակ: Առաջին հերթին, ներկայացնել սփյուռքում՝ Երուսաղեմում ու Նոր Ջուղայում, գտնվող հայկական խաչքարերի ամբողջական ժողովածուն: Այդ նպատակով Յարութիւն Խաչատրեանն ու Միշէլ Պասմաճեանը ավելի քան տասը տարի աշխատել են այս երկու քաղաքներում, ինչպես նաև Հայաստանում՝ հավաքելով և լուսանկարելով խաչքարերի արվեստի բացառիկ ժառանգությունը, որը, ի դեպ, 2010թ. ՅՈՒՆԵՍԿՕ-ի կողմից ճանաչվեց որպես ոչ նյութական մշակութային համաշխարհային ժառանգության մաս:

Այս աշխատանքը, փաստագրելով յուրաքանչյուր հուշարձանի բոլոր մանրամասները և դրան հավելելով լուսանկարներ, ստեղծում է նաև խաչքարերի պահպանության հնարավորություն: Երկրորդ հերթին, հեղինակներն աշխատել են ստեղծել մի համակարգ, որը հնարավորություն կտա վերլուծել, դասակարգել և ցուցակագրել մեծ քանակությամբ հավաքագրված պատկերագրական և վիմագրական տեղեկությունները:

Շնորհանդեսի ընթացքում գիրքը կարող եք ձեռք բերել հատուկ զեղչով:

#Խաչքար #Խաչքարայինարվեստ