Search

«Դուդուկ և նրա երաժշտությունը»

Դուդուկը մշտական և ընդլայնվող գործառույթ ունի ազգային մշակույթի գրեթե բոլոր բնագավառներում` ազգային երգարվեստի, պարարվեստի, երաժշտար­վեստի: Դուդուկի երաժշտությունն այսօր շարունակում է մնալ ավանդական ժողովրդական համույթների երգացանկում: Վերջին տարիներին դուդուկը լայն կիրառություն է ստացել նաև ժամանակակից դասական երաժշտարվեստում, էստրադային երգարվեստում և պարարվեստում: Դուդուկը ներմուծվել է նաև ջազային արվեստ և օգտագործվելով ֆոլկ-ջազի սինթեզման փորձարկումներում` ստացել հետաքրքիր լուծումներ ու մեկնաբանություններ:

Դուդուկի օգտագործումը հայ ժողովրդական երաժշտարվեստում, երգարվես­տում և նվագարանային կատարողական արվեստում համարվում է ամենա­կենսունակը: Այն պահպանվում է ոչ միայն պետական աջակցության շնորհիվ, այլև մեծ է հասարակության մեջ այս տարրի նկատմամբ հարգանքն ու արժևորումը:

Դուդուկի երաժշտությունը, որպես սոցիալական, կենցաղային պարտադիր տարր, ուղեկցում է հայ ժողովրդին տոնախմբությունների, հարսանեկան ծեսերի, սգո ու վշտի արարողությունների ժամանակ: Նրա սոցիալական գործառույթն ինչպես դարեր առաջ, այնպես էլ այսօր պահպանվում է և հայ ժողովրդի կողմից ընկալվում որպես ազգային ինքնության բաղադրիչ:

Դուդուկը հնչում է գրեթե ամեն օր` հեռուստառադիոհաղորդումներում, ֆիլմերում, ինչպես նաև համերգային ծրագրերում:

Շնորհիվ միջազգային ճանաչման և համբավի մեծացել է մատաղ սերնդի ներկայացուցիչների ոգևորությունն ու մղումը դեպի դուդուկը: Տարրի ներառումը ցանկում զգալիորեն խթանել է արտասահմանյան երկրներում բնակվող հայերի ազգային ինքնության պահպանության զարթոնքը:

Հայկական դուդուկը սկսեց լայն կիրառում ստանալ նաև տարբեր երկրների տեղական և համաշխարհային ճանաչում ունեցող նվագախմբերի կողմից: Մի շարք երկրների մշակութային կազմակերպություններ պարբերաբար կազմակերպում են դուդուկի կատարողական վարպետության դասեր: Մասնավորապես 2009 թվականից Գևորգ Դաբաղյանը Ամստերդամում և Վալանսում անց է կացնում ամենամյա վարպետության դասեր: Միջազգային մեծ ճանաչում են ձեռք բերել անվանի կոմպոզիտոր Վաչե Շարաֆյանի դուդուկի համար գրված ստեղծագոր­ծությունները, որոնք 2007-2012 թվականներին հնչել են Իտալիայում, Ռուսաստա­նում, Ֆրանսիայում, ԱՄՆ-ում աշխարհահռչակ այնպիսի նվագախմբերի կողմից, ինչպիսիք են Բոստոնի սիմֆոնիկը, Մոսկվայի սոլիստները, Սիցիլիայի և Իրկուտսկի ֆիլհարմոնիկ նվագախմբերը: Այս համերգային ծրագրերում իրենց կատարումներով հանդես են եկել անվանի դուդուկահարներ Գևորգ Դաբաղյանը, Էմմանուել Հովհաննիսյանը, Ջիվան Գասպարյանը:

http://www.unesco.org/culture/ich/en/RL/duduk-and-its-music-00092

Հեռ.՝ (010) 599 629
Հասցե՝ 0010, Երևան Վազգեն Սարգսյան 3, Կառավարական տուն 2
Էլ-փոստ՝ info@escs.amsecretariat@escs.am